Tónlistarmaðurinn Auður gefur nú út svítuna „ljós“, föstudaginn 3. apríl. „Verkið er hvort tveggja í senn eitt lag og skipt í fjóra sjálfstæða kafla. Formið svipar því til svítu í klassískri tónlist,“ segir Auður, sem vann nýlega Íslensku tónlistarverðlaunin fyrir lag ársins 2019, Enginn eins og þú, auk þess sem hann var valinn söngvari ársins og tónlistarflytjandi ársins.
Að hans sögn er svítan „ljós“ hringrás ólíkra tilfinninga sem endurtaka sig í sífellu. Hringrás vanans sem við finnum okkur föst í. Losti og tilfinningin að kunna meta áráttuna sjálfa. Auður dregur formföst áhrif frá framsæknum rokkhljómsveitum eins og Pink Floyd og The Mars Volta og blandar því saman við rytmíska hljóðheima og persónulegar lagasmíðar. Þarna er valið fólk í hverju rúmi og tónlistarfólkið Bríet og Drengur flytja með honum hvort um sig eitt lag.
