Einn er kominn í einangrun og á þriðja tug manns hefur verið beðinn að fara í sóttkví í fjórtán daga vegna COVID-19 smits sem greindist hjá einstaklingi sem hafði verið á Rey Cup íþróttamótinu. Ekki er útilokið að fólkinu fjölgi eftir því sem smitrakning fer fram.
Smitið greindist í gær. Hafa ráðstafanir verið gerðar á íþróttamótinu og mótshaldarar unnið með smitrakningarteymi almannavarna og sóttvarnayfirvöldum, að því er fram kemur í tilkynningu frá embætti landlæknis. Samkvæmt upplýsingum frá embættinu mun umræddur einstaklingur og hópurinn sem hann umgekkst við ekki taka frekar þátt á mótinu.
Almannavarnadeild ríkislögreglustjóra og embætti landlæknis biðja fólk sem hefur sótt umrætt íþróttamót að gæta varúðar og huga að einstaklingsbundnum smitvörnum. Leiki minnsti vafi á hvort einkenni Covid-19 veirunnar séu til staðar er sá hinn sami beðinn um að fara í sýnatöku á næstu heilsugæslustöð.