„Nýjar vendingar er vinsæll frasi hjá mér í fyrirsögnum. Í dag gerðist það að Erla greindist loks jákvæð í þriðju skimun og kom hingað á Rauðarárstíginn,“ segir Ágúst Borgþór Sverrisson, fréttastjóri og rithöfundur, sem smitaðist af Covid á Íslenska barnum. Ágúst var í Kvöldviðtali Mannlífs þar sem hann lýsti dvöl sinni og einsemd á Sóttvarnahótelinu á Rauðaárstíg. Hann reiknaði með að verða fyrsti Covid-sjúklingurinn til að skrifa skáldsögu. En skjótt skipast veður í lofti því nú er komið á daginn að fréttastjórinn smitaði eiginkonu sína sem nú dvelur við hlið hans á hótelinu.
„Þar var okkur boðið upp á tvö samliggjandi herbergi með innangengt á milli. Við getum því verið hér saman í hálfan mánuð án þess að verða brjáluð hvort á öðru,“ skrifar Ágúst Borgþór, sáttur með að eiginkonan er komin til hans og einsemdin rofin.