Ýmis áhugaverð ummæli voru látin falla í þessari viku. Þetta eru nokkur þeirra.
„Eina raunhæfa leiðin sem ég sé til að draga úr þessari þörf er að breiða lúpínuna markvisst út á þessum svæðum.“
-Ein af lausnum Ragnars Önundarsonar gegn áhrifum hlýnunar jarðar.
„Nánast öllum finnst launin sín óþarflega lág, vinnan streð, of fáir klukkutímar í sólarhringnum, viðskiptavinirnir fábjánar, afborganirnar þungar og námið í ruglinu. Ef planið er að selja okkur hugmyndina um að starf í kynlífsiðnaðinum sé nákvæmlega eins og að vinna í kjörbúð þá þarf að vinna aðeins betur í handritinu …“
-Stefán Pálsson í kjölfar viðtals sem Frosti Logason tók við vændiskonu.
„Svört og ólögleg atvinnustarfssemi er enn allt of útbreidd og gerir samkeppnisstöðu fyrirtækja, sem eru með allt sitt uppi á borðum, algjörlega óþolandi.“
-Bjarnheiður Hallsdóttir, formaður Samtaka ferðaþjónustunnar, um ólöglega starfsemi í ferðaþjónustu.
„Verðlaunin fyrir það að gera skynsamlega kjarasamninga eru lægri vextir og vonandi erum við að fara að sjá þau verðlaun koma fram.“
-Ásgeir Jónsson seðlabankastjóri á kynningarfundi vegna ákvörðunar peningastefnunefndar Seðlabankans um að lækka stýrivexti í dag úr 3,5% niður í 3,25%.
„Það er gott að eiga iðnaðarmenn að.“
-Hjálmar Jónsson, formaður Blaðamannafélags Íslands, um tilboð í kjaraviðræðum sem barst BÍ frá Samtökum atvinnulífsins á dögunum. Samningurinn var svo sambærilegur samningnum sem gerður var við iðnaðarmenn á dögunum að þar segir orðrétt: „Samningsaðilar skulu skipa starfshóp sem skipaður verði þremur fulltrúum stéttarfélaga iðnaðarmanna og þremur fulltrúum Samtaka atvinnulífsins.“
„Ég er ekki handtaska mannsins míns, sem má grípa í þegar hann hleypur út um dyrnar og stilla á upp hljóðlega við hlið hans við opinbera viðburði.“
-Eliza Reid, forsetafrú Íslands, um hlutverk sitt sem forsetafrú Íslands í grein í The New York Times í vikunni. Eliza er með BA-gráðu í alþjóðasamskiptum og meistarapróf í sagnfræði. Hún hefur meðal annars starfað við ritstjórn og blaðamennsku, hefur unnið mikið í þágu rithöfunda og er verndari ýmissa samtaka á Íslandi svo fátt eitt sé nefnt.
„Ég tel að í okkar fámenna samfélagi ættum við að geta verið í fremstu röð í netöryggismálum. Þar erum við hins vegar ekki í dag.“
-Sigurður Ingi Jóhannsson, samgöngu- og sveitarstjórnarráðherra, þegar hann setti ráðstefnu um netöryggi í Hörpu.
„Kostirnir eru auðvitað þeir að ríkið tekur á sig í eitt skipti fyrir öll bótaskylduna.“
-Ragnar Aðalsteinsson lögmaður um frumvarp forsætisráðherra um bætur vegna sýknudóms Hæstaréttar í Guðmundar- og Geirfinnsmálinu.