DV greindi frá því fyrr í dag að ung kona, að nafni Aimee Hope Bothwell, væri týnd og hefði verið saknað síðan á sunnudag. Hún hafði áður lýst áhyggjum sínum af karlmanni sem hafði elt hana á milli vínveitingastaða. Meðlimir Facebook-hópsins Foreigners in Iceland, eða útlendingar á Íslandi, höfðu miklar áhyggjur af Aimiee og hafði verið lýst eftir henni í fjölmörgum hópum á Facebook. Þá var færslu þar sem Jökull Ernir Jónsson lýsti eftir Aimee deilt hátt í fimm hundruð sinnum. Þar skrifaði Jökull:
„Kannast einhver við þessa konu Aimee Hope Bothwell? Hún póstaði á grúppu fyrir útlendinga á Íslandi um að það væri einhver að elta hana og nú hefur hvorki heyrst né sést af henni í rúma viku. Endilega dreifið þessu.“
Tilkynnt var um hvarf Aimee Hope til lögreglu og nú rétt fyrir klukkan 20:00 fengust þær upplýsingar að Aimee væri fundin heil á húfi. Jökull Ernir hefur nú uppfært færslu sína og segir:
„Hún er fundin og heil á húfi! Takk kærlega fyrir að deila þessu.“
Áhyggjur af hvarfi Aimee Hope voru miklar og sérstaklega í ljósi þess að hún hafði fyrir rúmri viku greint frá því að hún hefði verið elt af eldri manni, írskum. Sagði hún manninn hafa elt hana frá Dillon yfir á tvo aðra bari, Kaffibrennsluna og Vínstúkuna. Vitnað er í Aimee á DV og þar haft eftir henni.
„Í fyrra skiptið hélt ég að þetta væri tilviljun en í seinna skiptið þá vöruðu tvær konur mig við sem voru á barnum með mér. Þær sögðu að hann hafi verið að horfa mikið inn um gluggana áður en hann kom inn, eins og að hann væri að reyna að finna mig. Ég hafði farið af Dillon til að komast frá honum og ég neitaði að tala við hann á Kaffibrennslunni og fór upp til að komast hjá honum. En hann sat niðri með dyrnar í sjónlínu svo hann sá þegar ég fór.“
Þá greindi vinur hennar frá því í Facebook-hópnum Foreigners in Iceland að Aimee Hope væri komin í leitirnar en hann sagði: „Hún er fundin heil á húfi en hún hafði síðustu daga dvalið á spítala.“
**UPDATE**