Í kjölfar kórónuveirufaraldursins hefur sala á áfengi aukist til muna hér á landi.
Í tæplega hundrað ára sögu ÁTVR, hefur heildarvelta Vínbúðarinnar aldrei verið jafn mikil og hún var í fyrra, en hún fór yfir 50 milljarða.
Frá þessu er greint í árs- og samfélagsskýrslu ÁTVR fyrir seinasta ár.
Í formála forstjóra ÁTVR, Ívars J. Arndal, kemur fram að afkoma var langt umfram áætlun, reksturinn óvenjulegur vegna Covid-19, veltuhraðinn verið fáheyrður og mikið álag á starfsfólki. Segir hann jafn framt með ólíkindum að þetta hafi gengið upp.
Sjá einnig: Brjálað að gera í Vínbúðum landsins
Í gegnum dreifingamiðstöð ÁTVR fóru yfir 26 milljónir lítra í fyrra, en magnið jókst um rúmar fjórar milljónir lítra á árinu.
Samkvæmt Ívari var öllum lager Vínbúðarinnar velt á innan við níu dögum að meðaltali yfir árið, en meðalbirgðir í dreifingarmiðstöðinni eru um 600 þúsund lítrar.
Segir hann tölurnar sýna ótvírætt hvað gekk á.
Sjá einnig: Færri leita í meðferð meðan drykkja hefur stóraukist í Covid-faraldrinum
Fram kemur að stærsti dagur síðasta árs hafi verið 30. desember. Þann dag voru viðskiptavinir ÁTVR 43.767 talsins og fór sala dagsins yfir hálfan milljarð króna, en seldir voru 286.189 lítrar.
Þá kemur fram að sala tóbaks hafi einnig aukist á síðasta ári. En tóbak var selt fyrir 12,5 milljarða árið 2020.