Flug stoppað á lokametrum samninga.
Allt flug WOW air hefur verið stöðvað á meðan samningaviðræðum um hlutafjáraukningu lýkur. WOW sendi frá sér tilkynningu í nótt þar sem fram kemur að gripið hafi verið til þessarar ráðstöfunar vegna þess að félagið sé á „lokametrunum við að klára hlutafjáraukningu við nýjan eigendahóp í félaginu“. Ekki kemur hins vegar fram hversu langan tíma félagið þurfi til að ljúka viðræðum.
Forsvarsmenn og ráðgjafar WOW hafa kynnt áætlun um endurskipulagningu á rekstri WOW fyrir fjárfestum. Samkvæmt áætlunum er gert ráð fyrir algjörum viðsnúningi í rekstri WOW strax á næsta ári. Að lausafjárstaðan verði orðin jákvæð um 9 milljónir dollara samanborið við neikvæða stöðu upp á 11 milljónir dollara eins og nú er. Raunar er búist við að staðan verði orðin neikvæð um 45 milljónir króna um mitt þetta ár, segir í Markaðinum, sem svipti hulunni af þessari áætlun í gærmorgun.
Stöðvun fluga WOW air nú kemur illa við farþega. Sex flugvélar áttu að koma frá Bandaríkjunum í nótt. Engin þeirra lagði af stað frá flugvöllum vestanhafs. Í frétt á RÚV er greint frá því að hluti farþega í flugi frá Baltimore til Keflavíkur hafi verið kominn um borð í vélina þegar fluginu var aflýst. Þá áttu sjö flugvélar að halda til Evrópu í morgun en þar sem flestar flugvélarnar voru fastar í Banadríkjunum varð ekkert af því. Fjöldi Twitter-notenda hefur greint frá því að þeir séu fastir á flugvöllum bæði hér á Íslandi og víðar og eru síður en svo ánægðir með stöðuna sem er nú komin upp.
Engar skýringar hafa fengist frá Wow Air um það hvers vegna flug hefur verið fellt niður. Samkvæmt fyrrnefndri tilkynningu frá félaginu er frekari upplýsinga að vænta frá félaginu klukkan níu á eftir.
Fréttin hefur verið uppfærð.