Alma Glóð Kristbergsdóttir ákvað 22 ára gömul að eignast barn upp á eigin spýtur með aðstoð gjafasæðis. Án þess að hafa vitað af því fyrifram varð hún þar með sú yngsta sem hefur farið í slíka tæknifrjóvgun. Alma segir að á þessum tíma hafi hún ekki getað hugsað sér að fara í samband vegna pressunnar um barneignir.
Alma segir ákvörðunina hafa verið ótrúlega auðvelda. Hún ræddi tæknifrjóvgunina og fordómana sem hún átti von á í viðtali við Fréttablaðið um helgina. „Það tekur sumar konur töluvert lengri tíma að taka þessa ákvörðun en þetta var eitthvað sem mig hefur alltaf dreymt um og var þess vegna ein auðveldasta ákvörðun sem ég hef tekið. Ég var stressuð að segja frá þessu og fá mögulega neikvæð viðbrögð. Ég bjóst alveg við því að fá holskeflu af athugasemdum. Fólk hefur eflaust sína skoðun en það hefur hingað til haldið henni út af fyrir sig, sem ég er mjög þakklát fyrir,“ segir Alma.
„Ég fann að ef ég hefði farið út í samband eða reynt að finna einhvern maka þá hefði þessi pressa um að eignast barn komið strax.“
Alma segir það ekki alltaf dans á rósum að vera einstæð móðir. „Auðvitað er það erfiðara að vera ein, ein að taka ákvarðanir, ein að sjá um innkomu og ein að taka ábyrgðina. En þó að eitthvað sé erfitt er það samt þess virði ef þetta er það sem maður vill.“
„Ég fann að ef ég hefði farið út í samband eða reynt að finna einhvern maka þá hefði þessi pressa um að eignast barn komið strax. Núna er þessi pressa ekki til staðar og komi einhvern tímann einhver maki inn í myndina þá veit sá aðili að mér fylgir barn, sem mun alltaf verða í fyrsta sæti.“
Alma segir tímana sem betur fer vera að breytast og sennilega hefði það ekki þótt félagslega samþykkt fyrir einhverjum árum að fara þessa leið. Það eigi hins vegar ekkert að hindra fólk í að stofna til fjölskyldu að hennar mati:
„Þegar maður veit að maður vill eitthvað þarf maður ekki að bíða.“
