Anna Þorsteinsdóttir, eigandi Osushi veitingastaðanna, segir lítið sem ekkert að gera í kórónuveirufaldrinum en þrátt fyrir það hafi hún nýverið upplifað sína dásamlegustu vakt í langan tíma. Þar afgreiddi hún 94 ára gamla konu sem var að smakka sushi í fyrsta sinn.
Anna deilir upplifun sinni inni í hópnum Matartips! á Facebook og hefur fengið þar mikil viðbrögð við frásögninni. „Verð að fá að deila þessu með ykkur 🙂 Er á vaktinni á Osushi Tryggvagötu, nema að hér komu tvær huggulegar dömur að fá sér sushi sem er svo sem ekki frásögufærandi nema þegar þær eru að gera upp í lokinn þá segir önnur þeirra Mamma ég borga núna og mamman segir NEI, dóttirinn vann þennan slag og segir við mömmu, þú borgar á morgun. Nema það að dóttirinn segir við mig að þetta sé í fyrsta skipti sem mamma hennar smakkar Sushi en hefur lengi langað til að prófa,“ segir Anna og bætir við:
„Ég spurði mömmuna hvernig smakkaðist og hrósaði henni fyrir hvað hún hefði verið flink með prjónana, hún sagði ljómandi gott og hló lítilega, á leiðinni út hvíslar dóttirin að mér ,,,hún er 94 ára :-)þetta er dásamlegast vakt sem ég hef unnið í langan tíma þó að það sé ekkert að gera í þessu covid ástandi.“