Lögregla handtók í gærkvöldi karlmann sem hafði áreitt konur í miðborginni. Segir í dagbók lögreglu að maðurinn hafi verið í annarlegu ástandi „og því réttast að hann gisti þangað til það rofar til.“ Skömmu áður hafði lögreglan afskipti af konu sem hafði skemmt bifreið. Reyndist hún vera undir áhrifum vímuefna en ræddi hún við lögreglu og liggur allt fyrir í málinu.
Þá barst lögreglu tilkynning um eld í verksmiðju í Hafnarfirði. Þegar lögregla og slökkvilið mættu á vettvang var búið að slökkva eldinn, sem átti upptök sín í vinnuvél. Að frátöldu tækinu urðu engar aðrar skemmdir. Þá voru skemmdarverk tilkynnt til lögreglu. Fyrst vegna skemmdarverka á þremur bifreiðum og síðar vegna skemmdarverka við skóla. Seinna málið telst upplýst. Um svipað leyti var lögregla kölluð út vegna manns sem ónáðaði gesti á veitingastað. Var hann á bak og burt þegar lögregla mætti. Nokkrir voru stöðvaðir fyrir of hraðan akstur eða akstur undir áhrifum vímuefna.