Bangsafélagið stendur fyrir árlegri hátíð félagsins Reykjavík Bear nú um helgina. Um 60 erlendir gestir eru á hátíðinni auk milli 70 – 100 bangsa sem búa á Íslandi.
Bangsafélagið er hagsmunafélag Samtakanna ’78 og félagsskapur bangsa (e. Bears). Bears on Ice hátíðin var fyrst haldi árið 2005 en árið 2019 var nafni hátíðarinnar breytt í Reykjavík Bear.
Reykjavík Bear stendur yfir í fjóra daga með nokkrum fjölda skemmtana en þar á meðal eru heimsókn í Bláa lónið, ferð um Gullna hringinn, bangsabrunch og bangsapartý öll kvöldin.
Í kvöld er risapartý á Gauknum þar sem gestir eru hvattir til að fara úr að ofan (e. Top off! Party) og DJ Mighty Bear þeytir skífum, og á morgun fara bangsarnir í Bláa lónið líkt og hefur verið gert á liðnum hátíðum. Síðan er búið að skipuleggja bangsabrönsj og fleiri bangsapartý á meðan hátíðin stendur yfir.
Allir eru velkomnir á Reykjavík Bear sís, trans eða kynsegin og alveg sama hvernig fólk lítur út en líkamsskömm verður að skilja eftir heima.