Hrafn Harðarson segir að íbúum á Seltjarnarnesi hafi næstum fækkað um einn í morgun. Hann lýsir innan Facebook-hóps íbúa hvernig ungur piltur hafi næstum verið keyrður niður við Mýrarhúsaskóla í morgun. Hann vill því minna nágranna sína á að passa sig í umferðinni og þá sérstaklega í kringum skólana.
„Það munaði ekki miklu að það hefði fækkað um einn íbúa á Seltjarnarnesi í morgun. Drengur, líklega í 1. eða 2. bekk, var að flýta sér yfir á grænum karli hjá Mýrarhúsaskóla rétt upp úr kl. 8 og ökumaður sem var að beygja inn gáði ekki nógu vel að sér og ætlaði að keyra áfram. Ökumaður sér ekki barnið fyrr en það er beint fyrir framan húddið á bílnum og nær sem betur fer að bremsa niður. Barninu bregður og fellur í götuna. Stendur svo á fætur með númeraplötuna nánast í andlitinu og hleypur áfram yfir götuna,“ segir Hrafn.
Hann segir þetta hafa verið ógnvekjandi. „Ógnvekjandi sjón sem margir sem urðu vitni að. Ég upplifði þetta sem áminningu til okkar allra um að fara sérstaklega gætilega núna í myrkrinu á morgnana, en fannst þessi áminning verða að skila sér víðar og set þetta því hér inn. Við sem keyrum á bílum í kringum skólana verðum að hægja á okkur og keyra nógu varlega þannig að við sjáum litla gangandi vegfarendur, jafnvel þó þeir séu án endurskinsmerkja (sem allir ættu að huga að núna).“