Björn Birgisson vonar að Birgir Þórarinsson, þingmaður láti sig hverfa af þingi.
Þá segist hann halda að Birgi komi ekki til með að líða vel á þingi eftir að hafa svikið flokk sinn síðastliðna helgi.
Birgir Þórarinsson sagði skilið við Miðflokkinn og færði sig yfir í Sjálfstæðisflokkinn. Þá lýsir Birgir því yfir í viðtali í morgun að fjölskylda hans hafi ekki verið látin í friði vegna málsins. Auk þess útskýrir hann hvers vegna hann tók þá ákvörðun að færa sig yfir í Sjálfstæðisflokkinn.
Í pistli Björns Birgissonar segir:
„Vanlíðan.
Sagt er að tilteknum glæpamönnum líði verr í fangelsum en öðrum.
Vegna eðlis glæpa þeirra.
Ekki get ég séð fyrir mér að Birgi Þórarinssyni muni líða vel á Alþingi eftir atburði helgarinnar.
Þar verður hann innan um fólk sem reynir af fremsta megni að svíkja ekki flokkinn sinn og kjósendur sína með því að hlaupa alfarið frá þeim og tilkynna ekki brotthvarfið fyrr en það er afstaðið.
Þar verður hann innan um fólk sem segir hann „háttvirtan“ með æluna í kokinu.
Honum á vafalítið eftir að líða illa á Alþingi þetta kjörtímabilið.
Vegna eðlis „glæpsins“ sem hann framdi.
Satt að segja vona ég að honum muni líða svo illa á þinginu að hann kjósi að láta sig hverfa þaðan.
Hann er skammarlegur skítablettur á lýðræðinu í landinu.“