Björn Birgisson, samfélagsrýnir og Grindvíkingur, segir Sjálfstæðisflokkinn og ráðherra hans, Áslaugu Örnu Sigurbjörnsdóttur skreyta sig með stolnum fjöðrum. Á RÚV sé talað eins og það sé henni að þakka fyrir ný lög um að börn megi hafa búsetu á tveimur stöðum.
Björn vitnar í frétt RÚV en þar segir: „Alþingi samþykkti í gær frumvarp dómsmálaráðherra sem heimilar börnum að hafa búsetu á tveimur stöðum ef foreldrar þeirra búa ekki saman. Frumvarpið var samþykkt með 59 samhljóma atkvæðum en 4 sátu hjá. Í frumvarpinu eru nokkur nýmæli á barnalögum, til að mynda ákvæði um heimild til að semja um skipta búsetu barna, lögbundnar forsendur samninga foreldra um forsjá, búsetu og umgengni í viðeigandi lagaákvæðum, nýtt ákvæði um samtal að frumkvæði barns, skýrari ákvæði um rétt barns til að tjá sig og breyting á ákvæðum um framfærslu og meðlag með áherslu á aukið samningsfrelsi foreldra“
Hann segir að Björt heitin framtíð eigi heiðurinn af þessu máli. „Einmitt. Frumvarp dómsmálaráðherra – rétt eins og málið sé komið frá Sjálfstæðisflokknum. Svo er alls ekki – en flokkurinn sá er virkilega duglegur að stela góðum hugmyndum og skreyta sig síðan með þeim stolnu fjöðrum. Þetta mál er komið frá Bjartri framtíð eins og sjá má á meðfylgjandi mynd.“