Boeing ætlar fresta framleiðslu á Boeing 737 MAX vélum í næsta mánuði þar til kyrrsetningu vélanna hefur verið aflétt. Þetta kemur fram í tilkynningu sem fyrirtækið hefur sent frá sér.
Eins og kunnugt er hægðu verksmiðjurnar á framleiðslu vélanna, úr 52 í 42 vélar á mánuði, eftir að vélarnar voru kyrrsettar af flugmálayfirvöldum víðs vegar um heim í mars á þessu ári vegna mannskæðra flugslys í Indónesíu og Eþíópíu. Upphaflega gilti kyrrsetningin til 16. júní en henni hefur ítrekað verið frestað og hefur hún valdið fjölda flugfélaga búsifjum enda MAX vélarnar þær söluhæstu í flugsögunni. Icelandair er eitt þeirra, en félagið þurfti meðal annars að uppfæra sína flugáætlun og leggja niður flug til nokkurra áfangastaða í kjölfar kyrrsetningarinnar.
Vonast var til að kyrrsetningu 737 MAX vélanna yrði aflétt snemma á næsta ári, en AFP segir tilkynningu Boeing gefa til kynna að lengra sé í að vélarnar fái flughæfnisskírteini en hefur verið haldið fram hingað til.