Börkur Gunnarsson, rithöfundur og Sjálfstæðismaður, segist ekki hafa getað horft lengi á viðtal við Sölva Tryggvason þar sem hann tjáði sig um sögusagnir sem ganga um hann. Börkur segist á Facebook einfaldlega ekki þola að horfa á grátandi fólk.
„Ég gjörsamlega þoli ekki grátandi fólk. Í nútíma lúxus samfélagi er grátur alltaf út af bulli eða non-issjú, einhver fékk ekki súkkulaðistykki, annar fékk ekki að gera það, hinn fékk ekki match box bíl, enn annar lenti í því að systkini dó, maki eða foreldrar, en sorrý það er hluti af lífinu, fólkið í kringum þig mun deyja, alltaf, undantekningarlaust. Bara spurning um tíma,“ segir Börkur.
Hann segist hafa samúð með Sölva. „Hann lenti í ógeðslegri lygasögu en það gerist hjá öllu frægu fólki og það sem verra er líka hjá óþekktu fólki sem getur ekki svarað fyrir lygina, ég þurfti að slökkva á viðtalinu þegar hann var farinn að gráta strax á annarri mínútu. Kíkti síðan aftur á þetta í gærkvöldi og komst yfir ógeðstilfinninguna þegar hann fór að gráta á fyrstu mínútum viðtalsins og fékk bara samúðartilfinningu eftir það,“ segir Börkur.
Hann er því ekki að skjóta á Sölva, líkt og orð hans gefa fyrst til kynna. „Þetta er hrikalega erfitt að lenda í þessu en allir þurfa að gera það og kannski svolítið flott að gráta sig í gegnum það í stað þess að kyngja því þögull. Kannski er Sölvi mesti töffari nútímans. Þetta var í það minnsta magnað.“