„Málið er ennþá til rannsóknar hjá okkur. En það er beðið eftir gögnum,“ segir Skarphéðinn Aðalsteinsson aðstoðaryfirlögregluþjónn hjá Lögreglunni á Norðurlandi eystra, um rannsókn á meintri byrlun Páls Steingrímssonar, skipstjóra hjá Samherja, og þjófnaði oig afritun á síma hans. Páll hefur lýst því hvernig síma hans var stolið á meðan hann lá milli heims og helju. Hann veiktist heiftarlega og lenti í hjartastoppi eftir að andlega veik fyrrverandi eiginkona hans gaf honum bjór.
Sími hans hvarf á meðan hann lá á sjúkrabeði. Seinna kom á daginn að síminn hafði farið í höfuðstöðvar Ríkisútvarpsins í Efstaleiti. Hann reyndist hafa verið afritaður og birtust fréttir í fjölmiðlum af svonefndum skæruliðum Samherja. Ríkisútvarpið fjallaði um svo málið á forsendum annarra fjölmiðla. Meðal þeirra sem koma við sögu málsins er Þóra Arnórsdóttir, ritstjóri Kveiks, sem hætti störfum fyrr á þessu ári og varð fjölmiðlafulltrúi Landsvirkjunnar.
Skarphéðinn vildi engu spá um framhald rannsóknarinnar. Viðtal við Pál Steingrímsson birtist á Veftv Mannlífs kl. 20 í kvöld. Þar fer hann í gegnum aðdraganda málsins, sjúkrasöguna og þau eftirmál sem hafa orðið.