Borgarskjalasafn Reykjavíkur verður lagt niður. Stefnt er að því að spara milljarða með þessu.
Borgarráð Reykjavíkur samþykkti í dag tillögu borgarstjóra, Dags B. Eggertssonar, þess efnis að leggja niður Borgarskjalasafn.
Var tillaga Dags kynnt á borgarráðsfundi fyrir tveimur vikum; afgreiðslu hennar var frestað þangað til í dag.
Byggir tillagan á samantekt KPMG, sem fór yfir stöðuna í rekstri Borgarskjalasafns og hvaða möguleikar væru í boði.
Í skýrslu KPMG voru nefndar þrjár leiðir; að reka Borgarskjalasafn áfram í núverandi mynd; að auka samstarf við Þjóðskjalasafn, meðal annars um byggingu nýs skjalasafns; að leggja Borgarskjalasafn niður í núverandi mynd, og flytja starfsemi sína til Þjóðskjalasafns.
Kom á daginn að síðasti kosturinn var talinn heppilegastur.
Sagði borgarstjóri í samtali við ruv.is að borgarráð hafi tekið stefnumarkandi ákvörðun en að málið eigi eftir að fara fyrir borgarstjórn.
„Sú [leið] sem varð fyrir valinu fólst í að hefja viðræður við Þjóðskjalasafn um sameiginlega stafræna varðveislu og í raun sameiningu þessara safna. Það myndi þýða að Borgarskjalasafn í núverandi mynd myndi ekki vera sjálfstæð eining.“
Bætir við um framhaldið:
„Það mun velta á því hvernig viðræðum miðar, hvaða niðurstaða verður þar og hvaða heildarniðurstaða verður á þessum varðveislumálum í landinu í heild.“