Dagur segir að ráðstefnan sé mikilvæga vegna þess að án umfangsmikils alþjóðlegs samstarfs muni ekkert gerast í loftslagsmálum. „Verkefnið er stórt en allar þjóðir þurfa að taka sig á. Borgir heimsins hafa verið leiðandi í því að draga úr útblæstri gróðurhúsalofttegunda með ótrúlega fjölbreyttum lausnum sem við skiptumst á að deila hvort með öðru, meðal annars hér í Glasgow.“
Umhverfisstofnunin UNEP birti í síðasta mánuði árlega stöðuskýrslu sína þar sem því er spáð að miðað við áform þjóða heims til að draga úr losun gróðurhúsalofttegunda eigi hiti á jörðinni eftir að hækka um 2,7 stig fyrir lok aldarinnar.
Á leiðtogafundi við upphaf umhverfisráðstefnu Sameinuðu þjóðanna í Glasgow um síðustu mánaðamót endurnýjuðu leiðtogarnir loforð sín um aðgerðir til að snúa þróuninni við, þar á meðal Indverjar sem heita kolefnishlutleysi í síðasta lagi árið 2070.
Í ljósi þessara loforða hefur UNEP uppfært stöðuskýrsluna og kynnti niðurstöðuna í dag. Hún er sú að áhrifin verða sáralítil. Inger Andersen, yfirmaður stofnunarinnar, sagði þegar hún kynnti uppfærsluna að staðan væri óæskileg. Þjóðir heims þyrftu að herða róðurinn enn frekar í umhverfismálum ef ekki ætti illa að fara. Ef litið væri á það sem ráðstefnan í Glasgow hefur skilað mætti líkja því við að fíll hefði tekið jóðsótt og fætt af sér litla mús.
Í gær ræddi borgarstjórinn um Græna planið um sjálfbæra þróun og Heilsuborgina Reykjavík í skála Norræna ráðherraráðsins á ráðstefnunni. Í dag mun hann taka þátt í undirskrift samgönguyfirlýsingar loftslagsráðstefnunnar – COP26 Transport Day Declaration. Og á morgun 11. nóvember verður borgarstjóri frummælandi á viðburði Norræna þróunarsjóðsins og Afríska þróunarbankans í Norræna skálanum um hvernig nýsköpun í borgarþróun geti opnað leiðir að sjálfbærum efnahagsbata – grænar og lífvænlegar borgir.
Hér má lesa fréttina í heild sinni.