„Óli og Gísli Marteinn í spjalli utan myndversins í Efstaleitinu. Þetta samtal ætti að vera mál málanna í þætti kvöldsins. Einhæft val á gestum þátta Gísla er auðvitað verðugt rannsóknarefni.“
Þetta skrifar Leifur A. Benediktsson, annar þeirra sem kalla sig Skiltakarlarnir, og deilir myndunum sem má sjá hér fyrir ofan. Ólafur Sigurðsson og Leifur mættu upp í Efstaleiti á föstudaginn til að afhenda Gísla Marteini Baldurssyni bænarbréf um að hleypa almenningi í þáttinn sinn. Þeim tveimur blöskraði að Bjarni Benediktsson yrði meðal gesta í skemmtiþætti sem að nafninu til væri ætlaður öllum landsmönnum.
Bréfið má lesa hér fyrir neðan en þar kemur fram viðhorf sem verður sífellt algengara, að RÚV ræði ávallt við fulltrúa elítu en venjulegt og jafnvel fátækt fólk sést aldrei. Þeir félagar segja hins vegar að hagmunaraðilar hafi alltof greiðan aðgang að RÚV.
Bréfið í heild sinni
Berist Gísla Marteini Baldurssyni, útvarpsstjóra og stjórn RÚV
Bænaskjal skiltakarlanna
Opið bréf til Gísla Marteins, stjórnenda og starfsmanna RÚV og útvarps allra landsmanna.
Kæri Gísli og RÚV, við viljum byrja á að þakka ykkur fyrir að vera fjölmiðillinn okkar og útvarpið okkar og að hafa fengið að alast upp við þá menningarstofnun sem Ríkisútvarpið er.
Hinsvegar er erindi okkar annað nú.
Okkur finnst að umræðu- og skemmtiþættir eins og þátturinn þinn séu að verða of einhliða í umfjöllun og vali á viðmælendum og oftar en ekki oft sama fólkið sem kemur fram að segja sömu hlutina.
Ríkisfjölmiðill á að endurspegla þjóðina og rödd hennar, rödd allra. Hinsvegar háir það umræðunni að sífellt komi að hagsmunaaðilar eða stjórnmálamenn sem gæta hagsmuna efnamanna. Meira að segja Alþingið okkar er alltof einhæft eins og stundum hefur verið bent á. Þar vantar oft rödd stórra þjóðfélagshópa. Þetta á ekki að vera svona og ekki er betra þegar hagsmunaaðilar geta gengið að því vísu að komast alltaf að í fjölmiðlum til að túlka sín sjónarmið á meðan aðrir hópar hafa alls ekki sama aðgang. Þetta þekkja flestir sem vinna við fjölmiðla enda virðast hagsmunaaðilar hafa keypt flesta fjölmiðla á Íslandi og geta þannig lokað á aðrar skoðanir en eigenda.
Sé mál til umræðu til dæmis í Silfrinu þar sem rætt er um spillingu í bankakerfinu, þá er einnig hagsmunaaðili í settinu sem gjammar fram í, heldur fram ósönnum eða vafasömum fullyrðingum og einfaldlega ,,Trumpar“ umræðuna, eins og oft er sagt nú á tímum, enda má vænta að leikurinn sé til þess gerður.
Í Bretlandi gekk þetta svo langt að vísindamenn og fréttamenn sem fjölluðu um umhverfisvána á BBC neituðu einfaldlega að koma í viðtöl ef þar væri á sama tíma aðili sem afneitaði hættunni. Við skulum vona að við lendum ekki þarna varðandi umræður á RÚV um stjórnmál og málefni sem varða almannahag á líðandi stund.
Að sjálfsögðu erum við ekki að fara fram á að ,,taka yfir umræðuna“ eða slíkt, heldur að þess sé gætt að hagsmunaaðilar hafi ekki svo greiðan aðgang að umræðunni á RÚV-miðlunum að þeir sem hafa önnur viðhorf fái lítinn sem engan aðgang í samanburði.
Í kvöld, í skemmtiþætti á föstudagskvöldi, er til dæmis boðinn mjög umdeildur stjórnmálamaður, Bjarni Benediktsson fjármálaráðherra og vafasamur kaupsýslumaður með tengsl við fjölmörg gjaldþrotamál frá tímum hrunsins.
Nú getum við sem sé búist við því að fá að heyra hans sjónarmið um bankasölu og önnur átakamál á skemmtilegum nótum í þættinum þínum og svo jafnvel aftur á alvarlegri nótum í Silfrinu á sunnudagsmorgun. Þar að auki hafa ótal greinar birst í fjölmiðlum undanfarið um hversu vænleg sala Íslandsbanka er fyrir ríkið. Vissulega hefur gagnrýni á þetta komið fram en við skiltakarlar teljum að það halli verulega á aðra hliðina í þeirri umræðu.
Því hvetjum við ykkur á RÚV að gæta að hlutverki ykkar á viðkvæmum tímum í samfélaginu þar sem þeir sem ,,eiga“ ráða en hinir verða að sjá um sig sjálfir í auknu atvinnuleysi, fátækt og menntunarskorti.
Við viljum því einfaldlega hvetja ykkur til að skoða hvort þið getið gert betur í að vera útvarp og fjölmiðill allra landsmanna.
Með kærri kveðju og þakklæti fyrir allt liðið,
Skiltakarlarnir