Dreifði myndbandi af sjálfboðaliða – „Þarna er bara verið að gera lítið úr manni“

Elín Soffía Harðardóttir, kennari og sjálfboðaliði til margra ára, lenti í leiðinlegu atviki á dögunum. Myndband var tekið upp á dyrabjöllumyndavél og þar sem Elín bankaði upp á og bauð heimilismanni rauða rós. Spurði heimilismaðurinn þá hvort hún væri á vegum Samfylkingarinnar og svaraði hún því játandi.
„Viltu ekki bara setja hana í gráu tunnuna sem er þarna hægra megin við þig?,“ spyr maðurinn en myndbandinu var dreift víða á samfélagsmiðlum. Elín sagði í samtali við Vísi að henni hefði brugðið að sjá myndbandið á netinu, samtalið hefði í raun verið lengra en seinni hlutinn var klipptur út. Elín hafði þá sagt manninum að það muni hún aldrei gera (henda rósinni). Hann hafi þá sagst vera að grínast og bað hana um að leggja hana á bekk við húsið og þar með þegið rósina.
„Ég er búin að vera í sjálfboðaliðastarfi fyrir flokka og í forsetakosningum síðan ég var sextán ára, og nú komin á sjötugsaldur. Ég hef bara aldrei orðið fyrir svona, þarna er bara verið að gera lítið úr manni,“ sagði Elín sem sárnaði er hún sá myndbandið. Ótal margir hafi sett sig í samband við hana eftir atvikið og fundið fyrir stuðningi. „Fólki finnst þetta bara ferlega ómerkilegt, að vera að ráðast svona á fólk sem er að vinna sjálfboðavinnu“.