Innbrotaalda var í gærkvöldi á höfuðborgarsvæðinu og þurfti lögreglan að sinna útköllum vegna innborta í þremur hverfum borgarinnar. Brotist var inn á heimili og í bifreiðar.
Í gærkvöldi var brotist inn í bifreið í Smáíbúðahverfinu þar sem munum var stolið og búið að skemma kveikjulásinn. Skömmu síðar var brotist inn á heimili í Hlíðahverfi þar sem losaður var gluggi til að komast inn. Hálftíma síðar var brotist inn á heimili í Múlahverfi þar sem stormjárn var skemmt til að komast inn. Einhverjar skemmdir voru á innanstokksmunum en þjófar höfðu sig á brott þegar öryggiskerfi fór í gang.
Síðla í gærkvöldið var lögreglan á höfuðborgarsvæðinu svo kölluð til vegna líkamsárásar á veitingastað í miðbænum. Ráðist var á dyravörð og viðkomandi kýldur í andlitið. Lögreglan telur sig vita hver árásarmaðurinn er.
Lögreglan fjallar einnig um það í dagbók sinni að hafa sinnt ungum manni sem datt af rafmagnshlaupahjóli rétt eftir miðnætti. Sá hlaut skurð við fallið og var illa áttaður þegar lögregla mætti á staðinn. Maðurinn var fluttur á bráðamóttöku til aðhlynningar.