Edda Falak sagði frá hótunum í Morgunútvarpi Rásar 2 í morgun í kjölfar færslu sem hún setti inn í Facebook hóp fyrir helgina. Þar óskaði hún eftir sögum af ónefndum þjóðþekktum manni sem átti að hafa keypt sér vændi af konum í fíknivanda.
„Ég set þessa færslu inn og fer í viðtal, þegar ég kem til baka úr viðtalinu eru nokkrir búnir að senda mér skilaboð, Kári og Þóra segja af sér og Frosti er búinn að gefa út yfirlýsingu“ Segir Edda í samtali við Morgunútvarpið.
Hún sagði ætlunina ekki hafa verið að ásaka neinn en margir töldu Eddu stefna á viðtal við konu sem væri með frásagnir af þessum ónefnda manni en hún segir ekki svo vera. Konu hafi þó leitað til hennar með upplýsingar um mann sem nýtti sér veikindi fíkla á kynferðislegan hátt, ætlunin með færslunni hafi verið sú að gefa konum tækifæri á að koma fram með sögur ef þær væru til.
Edda sagði nokkra menn hafa sent sér skilaboð þar sem þeir taka fram að ekki sé um þá að ræða. Hún segist sjálf ekki skilja hvernig þetta mál varð að því sem það er í dag og segir fréttamiðla hafa komið sér á óvart.
Edda hefur setið undir alvarlegum hótunum frá fjölda manna, hún segist þó reyna að lifa ekki í ótta en stundum komi upp sú hugsun að einhver þessa manna gæti raunverulega reynt að gera henni eitthvað, þá velti hún því jafn vel fyrir sér hvort hún þurfi að fá sér neyðarhnapp.