Formaður Tourette-samtakanna á Íslandi, Sindri Viborg, telur að breyta þurfi aðferðunum við að taka á eineltismálum hér á landi; Sindri segir að afar illa gangi að leysa úr eineltismálum innan skólakerfisins hér á landi, þar sem ekki er ljóst hver ber ábyrgð á því að taka á slíkum málum.
Sindri var viðmælandi í útvarpsþættinum Reykjavík síðdegis, á Bylgjunni.
Áberandi hafa verið fréttir um hræðilegt einelti sem tólf ára stúlka í Hafnarfirði hefur verið beitt – og eru lýsingarnar hreinlega ekki fyrir viðkvæma.
Í dag steig móðir stúlkunnar fram og ræddi um hið hrottalega einelti sem dóttir hennar hefur orðið fyrir í Hafnarfirði.
Sindri þekkir á eigin skinni að vera beittur einelti:
„Ég verð fyrir margra ára líkamlegu og andlegu einelti, ég er með fjöldann allan af beinbrotum eftir grófustu árásirnar; ég var stunginn með hníf,“ sagði Sindri og bætti þessu við:
„Þetta er líkamlega dótið, fyrir utan minni mál eins og að sauma saman göt á höfði eða einhvers staðar í andliti; gera að brákuðum útlimum. Það er svo fyrir utan hið andlega einelti og annan níðingsskap.“
Sindri segir tourette-sjúkdómurinn sem hrjái hann hafi án vafa verið afdrifaríkur þáttur í eineltinu sem hann varð fyrir; lýsir því hvernig andlega hliðin á eineltinu var; segir útskúfun hafa þar spilað afar stórt hlutverk:
„Það kemur enginn í afmælið þitt, er gott dæmi; þú býður tvöföldum bekk með sextíu nemendum, en það mætir enginn. Þér er ekki boðið í afmæli, eða færð rangar dagsetningar og tímasetningar; þú færð ekki að taka þátt í skólalífinu almennilega; það er gríðarlegt regn af niðrandi ummælum og öðru í frímínútum. Maður er útskúfaður í rauninni alls staðar.“
Sindri færði í tal að með tilkomu netsins hafi gerendum í eineltismálum verið veittur enn greiðari aðgangur að þolendum. Segir að ekki hafi verið gripið inn í þegar hann var lagður í hrottalegt einelti, þrátt fyrir að hafa leitast eftir því sjálfur:
„Það skilaði ekki neinum árangri; eftir nokkur ár var ég sjálfur kominn í sjálfsvígshugsanir og tilraunir. Þetta sligar mann.“
Eins og áður var nefnt telur Sindri að illa muni gangi að leysa úr eineltismálum innan skólakerfisins á Íslandi, þar sem ekki er ljóst hver ber ábyrgð á því að taka á slíkum málum. Þangað til verði erfitt að koma í veg fyrir einelti.