Ritstjóri Gestgjafans í hringiðu hryðjuverkaárása í Sri Lanka.
„Sri Lanka var valinn ferðamannastaður ársins 2019 af Lonely Planet, þannig að ég taldi mig vera að velja öruggan stað til að heimsækja,“ segir Hanna Ingibjörg Arnarsdóttir, ritstjóri Gestgjafans sem var ásamt dóttur sinni Viktoríu Kjartansdóttur stödd í Negombo í gær, en þar var framin hryðjuverkaárás í kirkjunni í morgun með þeim afleiðingum að 67 manns létust.
Samkvæmt fréttastofunni AFP var árásin hluti af röð sprengjuárása sem gerðar voru í Sri Lanka í morgun, en talið er að minnst 207 manns hafi látið lífið í þeim og fleiri hundruð særst. Virðast árásirnar hafa beinst gegn kristnu fólki og ferðamönnum, þar sem hótel og kirkjur í landinu voru helstu skotmörkin. Liggur grunur á að öfgaíslamistar, kenndir við NTJ (National Thowheeth Jama’ath), hafi verið að verki. Hefur fréttastofan eftir lögreglunni að minnst 25 hafi látist í árásinni á kirkjuna í Batticaloa, 45 í Kólombór og 67 í Negombo þar sem mæðgurnar Hanna og Viktoría voru staddar daginn áður.
Hanna, sem hefur skrifað töluvert um ferðalög bæði fyrir Gestgjafann og Mannlíf, segist ekki hafa lent í neinu í líkingu við þetta áður. Dagarnir fram að ódæðisverkinu hafi verið yndislegir í Sri Lanka og þær mæðgur hafi, þrátt fyrir að hafa lent í ýmsu, ekki upplifað sig óöruggar.
Nú séu þær komnar til Maldavíeyja eftir erfitt ferðalag og muni verja þar nokkrum dögum áður en haldið er til Íslands. Fram að því ætlar hún að fylgjast vel með gangi mála og ráðfæra sig við ferðaskrifstofuna, enda þurfi þær að millilenda í Kólombo á leiðinni heim. Hanna segir að á þessari stundu sé hugur þeirra mæðgna hjá íbúum Sri Lanka og fórnarlömbum árásanna.