Eftir að myndband af Eiði Smára Guðjohnsen, fyrrum landsliðsmanni í knattspyrnu og aðstoðarþjálfara íslenska karlalandsliðsins, létta á sér undir undir áhrifum áfengis í miðbæ Reykjavíkur fór í umferð hefur hann verið sendur í tímabundið leyfi frá störfum sínum fyrir KSÍ.
Eiður Smári starfar einnig hjá Símanum sem sérfræðingur um enska boltann sem fyrirtækið hefur einkarétt á hér á landi.
Mannlíf hafði samband við Tómas Þór Þórðarson sem er ritstjóri enska boltans og spurði hann hvort mál Eiðs Smára hefði einhver áhrif á stöðu hans hjá Símanum.
Tómas Þór segir að „það eru engar breytingar fyrirhugaðar á enska boltanum hjá Símanum.“
Eiður Smári mun því halda áfram starfi sínu sem sérfræðingur um enska boltann hjá Símanum, en hins vegar mun hann ekki snúa aftur til starfa hjá KSÍ fyrr en í fyrsta lagi í haust.
Enski boltinn er gríðarlega vinsælt efni hjá Íslendingum og Tómas Þór færir knattspyrnuaðdáendum hér á landi góðar fréttir: „Það verða áfram allir 380 leikirnir á næsta tímabili í beinni útsendingu hjá Símanum, þrátt fyrir að „fans“ snúi aftur.“