Rúmfataverslunin Rúmföt.is í Kópavogi varð í vikunni fyrir þriðja innbrotinu í verslunina á einu ári. Eigandi verslunarinnar segir ljóst að rúmfötin sín séu greinilega mjög vinsæl.
Björn Þór Heiðdal, eigandi Rúmfatabúðarinnar, segir það iðulega hafa verið óþæginlega tilfinningu að vera vakinn upp um nætur vegna innbrotanna. Aðspurður segir hann tjónið ekki mikið. „Þetta er ekki mjög skemmtilegt. Núna er þetta þriðja sinn sem er brotist inn. Viðkomandi hefur ekki komist yfir nema eitt og eitt rúmfatasett úr hillunum. Rúmfötin hjá okkur eru greinilega vinsæl því lokuð búð um miðja nótt kemur ekki í veg fyrir að fólk kíki í heimsókn,“ segir Björn Þór.
Björn Þór telur að sami þjófurinn eða þjófarnir hafi verið að verki í öllum innbrotunum. „Í síðasta innbrotinu var ekkert rótað eins og í fyrri innbrotum þannig að viðkomandi vissi betur hvar átti að leita.“