Eimskipafélag Íslands hefur beðið Arngrím Jónsson, starfsmann fyrirtækisins, afsökunar á framferði vinnufélaga í hans garð. Líkt og Mannlíf greindi frá hefur hann orðið fyrir sorglegu einelti í vinnu sinni vegna erfiðra veikinda.
Ingibjörg Arngrímsdóttir lýsti sorglegu einelti sem Arngrímur, aldraður faðir hennar, varð fyrir í vinnu sinni í Facebook-færslu sem hefur vakið mikla athygli. Ingibjörg segir föður sinn hafa orðið fyrir grimmu einelti vegna veikinda. Hann sé meðal duglegustu manna sem hún hafi kynnst en þrátt fyrir það hafi samstarfsmenn hans níðst á honum fyrir að vera frá vinnu vegna veikinda.
Edda Rut Björnsdóttir, samskiptastjóri Eimskips, segir að Arngrímur hafi verið beðinn afsökunar og að eineltisáætlun fyrirtækisins sé fylgt í hvívetna. „Leiðarljós okkar í samskiptum er að koma fram af kurteisi og virðingu við hvort annað og við tökum því alvarlega ef því er ekki fylgt. Brugðist verður við því atviki sem upp hefur komið núna af festu og ábyrgð. Okkur þykir málið mjög leitt og hefur viðkomandi aðili verið beðinn afsökunar fyrir hönd félagsins,“ segir Edda Rut, í svari sínu til Fréttablaðsins.