2019 | Birtingur útgáfufélag ehf | k.t. 620867-0129 | VSK.nr 11788 | Síðumúla 28 | Allur réttur áskilinn. Notkun á efni miðilsins er óheimil án samþykkis.

Eistnaflug kynnir fyrstu hljómsveitirnar fyrir árið 2020

Þungarokkshátíðin Eistnaflug fer fram í Neskaupstað 9. – 12. júlí 2020.

Hátíðin fagnar 15 ára starfsafmæli og er því 16. hátíðin framundan í júlí 2020 ásamt „Back to the Metal Roots“ viðburðum á höfuðborgarsvæðinu í vetur.

Fyrstu hljómsveitirnar eru nú orðnar opinberar, en þær eru Rock Paper Sisters og Zhrine.

Rock Paper Sisters var stofnuð á haustdögum 2017 af þeim Eyþóri Inga, Jónba, Steina og Þórði. Þrátt fyrir ungan aldur sveitarinnar er hún klyfjuð af reynslu og koma meðlimir úr hinum ólíkustu áttum í tónlist. Bandið er eitt af mörgum böndum sem hefur verið stofnað í partý en sennilega það eina sem lét verða af því að hittast, æfa og hvað þá koma fram. Markmið sveitarinnar var frá upphafi að vera ekkert að ofhugsa hlutina og semja bara áhyggjulaust rokk og ról. Sumarið 2018 kom svo út fyrsta lag sveitarinnar „Howling Fool“ og í kjölfarið kom hún fyrst opinberlega fram þegar hún fékk þann heiður að hita upp fyrir Billy Idol í Laugardalshöll. Sveitin hefur síðan þá komið fram á ýmsum hátíðum eins og Iceland Airwaves, Heima í Hafnarfirði og Rokk í Hafnarfirði sem og tónleikum víðsvegar um landið og sent frá sér þrjú lög í viðbót sem öll hafa fengið að heyrast á öldum ljósvakans. Vinnur sveitin nú að sinni fyrstu breiðskífu.

AUGLÝSING


Zhrine er með tónleikaferðalög um þrjár heimsálfur á bakinu og er sveitin ein af þeim efnilegustu í íslensku öfgarokki. Frumraun þeirra Unortheta neglir hina fullkomnu samsetningu af orthodox svartmálmi og framsæknum einkennum sem má búast við frá Íslandi. Jafnvel þó að færa megi rök fyrir að þessi nálgun sé heldur of algeng þessa dagana segir það sitthvað um styrk Zhrine og hæfileika að þeir ná að standa upp úr.

Óhefðbundin tónlistin sem vekur upp myndir af svartri eldfjallaösku heimalandsins og fimbulkulda sem smýgur í gegnum merg og bein er engan veginn auðmeltanleg. Hún dregur fram bítandi andrúmsloft á fágaðan hátt á sama tíma og hún nýtir sér nöturlega post metal viðkvæmni til að byggja upp áferðarmikinn glundroðann sem er hljómheimur Zhrine.

Viðburðir vetrarins og fleiri hljómsveitir verða kynntar á Facebook-síðu Eistnaflug og því rétt að fylgjast vel með síðunni. Miðasalan er einnig hafin.

Ekki missa af þessum

Annað áhugavert efni

Nýjast á Mannlíf.is