Vítalía Lazareva segir eitthvað hafa breyst innra með sér í ítarlegu viðtali við Fréttablaðið í dag.
„Svo allt í einu var ég tilbúin til þess að tala um þetta, Ég vissi að ef ég gerði það ekki myndi ég ekkert endilega vera tilbúin til þess síðar,“ segir hún í viðtalinu en steig hún fram í byrjun árs í hlaðvarpsþættinum Eigin konur. Þar sagði hún sögu sína og létu viðbrögðin ekki á sér standa.
Hún segist fá gæsahúð þegar hún hugsi til baka. Fólk talaði um að hún hefði breytt samfélaginu, hún væri þjóðhetja og nafn hennar yrði ritað í sögubækur.
,,Ég veit að þessi viðbrögð urðu ekki vegna þess að það var ég sem sagði mína sögu eða að hún hafi verið áhrifameiri en sögur annarra, ég held að þetta snúist um það hvenær ég sagði hana,“ segir Vítalía í viðtalinu og bætir við að þetta hafi verið tímapunkturinn þar sem samfélagið var bæði tilbúið og fólk búið að fá nóg.
Viðtalið við Vítalíu má lesa í heild sinni hér.