Lögregla handtók í gærkvöldi mann í Hlíðunum en sá hafði sýnt ógnandi hegðun. Maðurinn fór ekki að fyrirmælum lögreglu og var látinn gista bakvið lás og slá. Um svipað leyti barst lögreglu tilkynning um skemmdarverk í hverfi 108. Einn maður var handtekinn vegna málsins en ekki kemur fram í dagbók lögreglu hvert skemmdarverkið var. Fyrr um kvöldið var óskað eftir aðstoð lögreglu í Kópavogi þar sem maður hafði slasast og hlotið skurð á hendi.
Í Breiðholti var ekið á gangandi vegfaranda og lögregla kölluð út í kjölfarið. Vegfarandinn fann hvergi til eftir óhappið og ók lögregla honum til síns heima. Þá stöðvaði lögregla fjöldann allan af ökumönnum í gærkvöldi og í nótt. Nokkrir voru grunaðir um akstur undir áhrifum áfengis eða vímuefna. Þá var einn sektaður fyrir að aka með of marga farþega, annar fyrir að fara yfir á rauðu ljósi og þriðji fyrir akstur án ökuréttinda en sá hefur aldrei verið með bílpróf.