Ingi Tryggvason dómari við héraðsdóm Reykjaness gæti verið á leið í fangelsi, allavega miðað við það sem hann hefur látið eftir sér hafa í tengslum við hið víðfræga kosningaklúður á Norðurlandi vestra.
Byrjum á þessu:
Í almennum hegningarlögum má sjá fjölda fangelsisdaga sem menn þurfa að afplána, greiði þeir ekki lögreglusektir.
Þar sést að ef þú borgar ekki sekt á bilinu 240-270 þúsund krónur, ferðu í átján daga fangelsi.
Eiríkur Jónsson, sá gamli en spræki fjölmiðlarefur, skrifar stuttan pistil á miðli sínum, eirikurjonsson.is, þar sem hann veltir fyrir sér örlögum Inga Tryggvasonar, fyrrverandi formann yfirkjörstjórnar á Norðurlandi vestra.
Eins og alþjóð veit þá fékk Ingi á dögunum 250 þúsund króna sekt frá lögreglu fyrir kosningaklúðrið, sem braut kosningalög.
Sagðist Ingi í viðtölum, alls ekki ætla að borga sektina.
Og hvað skeður þá?
Fer Ingi á bak við lás og slá?
Það er því ekki óeðlilegt að Eiríkur velti því fyrir sér hvort Ingi verði dæmdur í átján daga fangelsi.
Nánast má fullyrða að Ingi hlýtur að vita af þeirri refsingu sem mun blasa við honum borgi hann ekki sektina; verandi dómari við héraðsdóm Reykjaness.