Eftir 11 daga réttarhöld var kviðdómur sammála Vanessu Bryant og lögfræðingum hennar um að lögreglu- og slökkviliðsmenn hefðu brotið á friðhelgi hennar. Höfðu mennirnir verið við störf þegar þeir tóku ljósmyndir af líkum Kobe Bryant og dóttur þeirra, Giönnu Bryant, eftir að flugvél þeirra hrapaði í janúar 2020.
„Ég var aftur blinduð, niðurbrotin og sár. Ég treysti þeim. Ég treysti þeim til að gera ekki þessa hluti,“ sagði Vanessa í réttarhöldunum. Bætti hún við að henni hafi þótt nógu erfitt að takast á við missinn en eftir að hún frétti af myndunum stóð hún frammi fyrir hryllingi. Í dómsal var sagt frá því þegar lögregluþjónn sýndi barþjóni myndir af líki Kobe Bryant meðan hann fékk sér drykki við barinn. Þá hafi slökkviliðsmenn sent myndirnar á milli sín í veislu. Báru þeir það fyrir sig að myndirnar hefðu verið teknar í þeim tilgangi að rannsaka slysið. Var skýringin ekki talin trúverðug þar sem um nærmyndir var að ræða.
„Ég lifi í ótta á hverjum degi við það að vera á samfélagsmiðlum og þessar myndir birtist. Ég lifi í ótta við að dætur mínar séu á samfélagsmiðlum og þessar myndir skjóti upp kollinum,“ sagði ekkja Bryans sem fékk 16 milljónir bandaríkjadala í bætur.