Þekktur rússneskur söngvari á það á hættu að verða slaufað vegna myndskeiðs sem birtist á samfélagsmiðlum. Þar virðist hann styðja málstað Úkraínu í stríðinu við Rússland.
Valery Meladze er gríðarlega vinsæll í Rússlandi þar sem hann býr en hann er hefur þann heiður að vera „verðugur listamaður rússneska ríkisins.“ Fram kemur á hinum rússneska vefmiðli Medusa að myndskeið hafi birst á samfélagsmiðlunum um helgina sem sýndi Meladze bregðast við orðunum „dýrð sé Úkraínu“ þar sem hann skemmti á gamlárskvöldspartýi í Dubai. Í myndskeiðinu sést Meladze halda ræðu en maðurinn á bakvið símaupptökuna kallar til hans „dýrð sé Úkraínu (Úkr. Slava Ukraine)“. Söngvarinn dró þá hljóðnemann frá andliti sínu og virðist mynda orðin „dýrð sé hetjunum!“ með vörum sínum. Fagnar þá myndavélamaðurinn en Meladze biður hann þá að róa sig og segir svo „við erum ópólitísk hér í dag.“
Stuttu eftir innrásina í Úkraínu fordæmdi Meladze framferði Rússlands og var fjöldi áætlaðra tónleika hans innan Rússlands aflýst í kjölfarið.
Ráðamenn í Rússlandi voru fljótir að bregðast við nýja myndskeiðinu. Yelena Afanasyeva, þingkona frá Orenburg-héraði Rússlands skrifaði færslu á samfélagsmiðli þar sem hún lét eftirfarandi orð falla:
„Villimennskan! Ljótleikinn! Svikin! Vegna stuðning hans við Banderítanna ætti Meladze að missa ríkisborgararétt sinn. Á meðan þegnar okkar deyja fyrir rússneskan almenning með því að verja rússnesk svæði, leyfir sumt fólk sér að gefa nasistakveðjur með úkraínskum nasistum. Þetta er óásættanlegt.“
Formaður Sanngjarnt Rússland-flokksins, Sergey Mironov sagði:
„Í veislu utan landsteinanna lýsti söngvarinn Valery Meladze yfir stuðningi við slagorð úkraínskra þjóðernissinna. Jájá, hann afsakaði sig eftir á. En að vera í veislu í útlöndum og taka þátt í að söngla glæpsamleg slagorð – er það eitthvað ópólitískt?“
Hegðun hans er vítaverð. Sannur rússneskur listamaður getur ekki og ætti ekki að hegða sér svona. Hann er að reyna að fá bæði, halda kökunni og borða hana líka. Það er kominn tími til að velja hlið. Það má reyndar sjá á hegðun hans, að þessi „listamaður“ er nú þegar búinn að velja sér hlið. Ég sting upp á að Meladze verður sviptur öllum verðlaunum sínum. Það er sanngjarnt og rétt að gera.
Þá tjáði sig einnig Yelena Drapeko, þingmaður frá St. Pétursborg:
„Ég styð það að lýsa honum sem „erlendum njósnara.“ En það væri betra fyrir hann að fara úr landi og vera bannaður í gjörvöllu Rússlandi.“
Samkvæmt Telegram-rásinni Mash, hafa samtökin Her verjenda föðurlandsins (e. Army of Fatherland Defenders), tilkynnt Meladze til rannsóknarnefndar Rússlands og til ríkissaksóknara og krefjast þess að söngvarinn fái ekki að snúa aftur til Rússlands. Samtökin vilja einnig að alríkisyfirvöld landsins rannsaki hvort Meladze hafi hlotið rússneskan ríkisborgararétt á löglegan máta en söngvarinn er fæddur í Georgíu á Sovíet-tímanum.
Meladze brást við viðbrögðunum í gær á Telegram:
„Fólk, ég vil vera viss um að þið heyrið í mér og skiljið mín orð. Eins og margir aðrir hef ég burðast með þunga þanka og sorg, síðustu 10 mánuði. Það vill svo til að tvær þjóðir sem ég elska innilega, eiga í útistöðum þar sem fólk er að deyja. ÉG GET EKKI OG VIL EKKI HATA NOKKURN OG ÉG ER EKKI AÐ REYNA AÐ KOMA TIL MÓTS VIÐ NEINN. Ég vil bara að þessar deilur endi og að samkomulag náist milli þessara ríkja. Og svo það megi gerast, er ég tilbúinn að gefa allt sem ég get.“
Hér fyrir neðan má hlusta á stærsta smell Meladze:
Athugasemdir