Hin 24 ára Abigail White myrti barnsföður sinn og kærasta á bar í Bristol, Bretlandi. Parið var úti að skemmta sér þegar upp kom ágreiningur á milli þeirra sem endaði með því að Abigail stakk sambýlismann sinn í hjartað með hníf. Parið átti saman þrjú börn og hafði Abigail notast við síðuna OnlyFans til að afla sér tekna. Síðan gengur út á áskriftasölu þar sem fólk safnar áskrifendum sem borga fyrir að sjá myndir og myndbönd, oftar en ekki af kynferðislegu tagi. Kærasti hennar var hinn 22 ára Bradley Lewis.
Abigail sagði fyrir dómi að hún hafi ekki ætlað sér að myrða kærasta sinn, hún hafi einungis ætlað að hræða hann. Fyrr um kvöldið hafði parið rifist eftir að Abigail lenti í slagsmálum, hún sagði hann ekki hafa staðið með sér sem reitti hana til reiði.
„Við vorum að rífast og hann ýtti í mig, ég fór inn í eldhús og sá hníf á borðinu sem ég tók upp og gekk að Brad. Ég ætlaði að hræða hann með hnífnum, áður en ég vissi af var ég búin að stinga hann,“ sagði Abigail en hún segist þó ekki muna eftir atburðinum. „Ég hjálpaði honum úr fötunum til að reyna að stöðva blæðinguna.“
Abigail sagði lögreglu upphaflega að Bradley hafi stungið sig sjálfur en leiðrétti það síðar. Réttarhöld yfir Abigail White standa enn yfir.