Erna Ýr Öldudóttir, þáttastjórnandi á Útvarpi Sögu og álitsgjafi ýmsa fjölmiðla, fer mikinn í athugasemd við færslu Hannesar Hólmsteins Gissuraronar, prófessors við Háskóla Íslands. Hannes kvartar undan því að mögulega fái Íslendingar ekki nægilega mikið bóluefni við COVID sem fyrst. Erna segir landsmenn ekkert þurfa bóluefni, því Kínverjar eigi lager af álíka veirum.
„Við þurfum ekkert bóluefni. Þetta er tiltölulega væg pest og það eru til ódýr, gamalreynd lyf við henni, handa þeim sem þurfa. Hydroxychloroquine, Remdesivir og Ivermectin, auk Dvítamíns, Zink o.fl. Þetta er bara óstjórnlegur peningaaustur og massahystería,“ skrifar Erna Ýr.
Hún virðist telja að COVID sé kínverskt samsæri til að koma höggi á Vesturlönd. „Ef það er rétt sem að kínverski veirufræðingurinn, konan sem slapp til Bandaríkjanna, sagði, þá eiga kínverjar amk. 11 mismunandi gerðir af þessum vírus. Mér sýnist WHO vera að staðfesta það núna með því að segja að þetta sé ekki búið og við skulum búa okkur undir annan faraldur. En svona ætlar Kína ef til vill að vinna vestrið, af því að fólk er hætt að horfa á vísindi, rök og staðreyndir, en eltir hagsmuni stórfyrirtækja og pólitíkusa – og fjölmiðlarnir og samfélagsmiðlarnir klappa með,“ skrifar Erna Ýr.