Lögreglan fór í fjögur útköll vegna rafskútuslysa í gærkveldi og nótt.
Ung kona datt af rafmagnshlaupahjóli laust fyrir klukkan hálf tíu í gærkveldi. Hún kvað hjólið hafa brotnað þegar hún var á miklum hraða. Hún slasaðist á hné og var flutt með sjúkrabíl á Bráðadeild. Atvikið átti sér stað í Háaleitis- og Bústaðarhverfi.
Ungur maður datt á rafmagnshlaupahjóli í Laugardalnum og hlaut að öllum líkindum höfuðhögg. Manninum gekk illa að standa upp og var hann fluttur á Bráðadeild. Slysið átti sér stað klukkan hálf tólf í gærkveldi.
Þá voru tvö slys í miðborg Reykjavíkur, ótengd mál. Stúlka datt fram fyrir sig á rafmagnshlaupahjóli og meiddist hún á munni og höku. Móðir stúlkunnar fór með hana á bráðadeild. Í hinu tilvikinu datt maður og hlaut áverka á hné og kinn. Hann var fluttur á Bráðadeild. Atvikin áttu sér stað klukkan rúmlega tvö í nótt.