Ríflega helmingur karla sem voru á aldrinum 15 til 24 ára árið 1994 voru á því máli að réttlætanlegt væri að berja konuna sína. Þessi hópur er á bilinu 42 til 51 ára í dag. Þetta kom fram í þjóðarpúlsi Gallup árið 1994 en Þórdís Gísladóttir rithöfundur rifjar þetta upp á Twitter.
Ekki eru nema tæplega þrjátíu ár síðan þessi könnun var framkvæmd. Margir eru uggandi yfir þeim fjölda sem taldi það réttlætanlegt að lúskra á eiginkonu sinni. Líkt og fyrr segir þá var meira en helmingur þeirra yngstu sammála því. Hlutfallið var 46,2 prósent meðal karla sem þá voru 25 til 34 ára. Karlar sem voru þá 55 til 69 ára voru andvígastir en ekki kemur fram í hvaða hlutföllum.
Athygli vekur að 37,2 prósent kvenna á aldrinum 15 til 24 töldu eiginmenn mega slá konur. Til samanburðar þá var sambærileg könnun gerð af Gallup í Bandaríkjunum og þar töldu einungis 14 prósent karla réttlætanlegt að berja eiginkonurnar.
Helga Vala Helgadóttir, þingkona Samfylkingarinnar, skrifar athugasemd við færslu Þórdísar og er ljóst að henni setur óhug. „Alveg ferlegt að setja hjarta við þessa brjálæðislegu könnun. Þetta er alveg með ólíkindum – það er svo stutt síðan!“
Þjóðarpúls Gallup 1994 pic.twitter.com/g8yFkNxaNS
— Þórdís Gísladóttir (@thordisg) February 23, 2021