Frystihúsið bílasafn var formlega opnað í gamla frystihúsinu á Breiðdalsvík í dag.
Við opnunina var boðið upp á leiðsögn um salinn, en safnið mun verða opið alla daga vikunnar í sumar.
Bílaáhugamennirnir Guðbjartur Guðmundsson, Ingólfur Finnsson, Ólafur Hvanndal og Ingólfur Finnbogason eiga veg og vanda að framtakinu en óhætt er að segja að þeir félagar hafi gert Breiðdalsvík að miðpunkti langaksturstúra – en svæðið er annálað fyrir skemmtilegar akstursleiðir.
Frysthúsið hefur að geyma um tuttugu bifreiðar sem eru frá árunum 1936 til 2004; perlur úr íslenskri ökutækjasögu og eiga sér afar áhugaverðar sögur sem tengjast íslenskri bílasögu.
Þar má sjá handsmíðaða íslenska sportbílinn Adrenalin, sem var hannaður og smíðaður frá grunni á Íslandi.
Og eins og að það sé ekki nóg þá má líka sjá á safninu hina þekktu Mercedes-Benz bifreið Nasistans Werners Gerlachs ræðismanns Þýskalands á Íslandi í seinni heimstyrjöldinni; auk annarra bíla sem sjaldséðir eru hér á landi.
Húsakynni safnsins eru vegleg; þar má njóta glæsilegs útsýnis við sjávarsíðuna innan um listaverk á fjórum hjólum.