Guðni Th. Jóhannesson, forseti Íslands, var bólusettur fyrr í dag. Hann fékk bóluefnið frá AstraZeneca en fjögur þúsund Íslendingar munu fá það einnig í vikunni. RÚV greinir frá þessu. Guðni var léttklæddur, líkt og óskað var eftir, en á bol hans mátti sjá listræna túlkun á víkingaklappinu. Nærri 40 þúsund verða bólusettir í þessari viku.
Guðni segist gífurlega þakklátur á Facebook. Þar skrifar hann: „Í morgun fékk ég bóluefnið AstraZeneca gegn Covid-19. Ég varð þess heiðurs aðnjótandi að hitta fyrst starfslið í bækistöðvum Heilsugæslunnar á höfuðborgarsvæðinu þar sem efnið er sett í sprautur og annar undirbúningur fer fram. Svo lá leiðin niður í Laugardalshöll. Ég segi það hreina satt að mér leið eins og fram undan væri spennandi landsleikur og í höllinni voru móttökurnar ekki síðri. Fagmennska og hlýja einkennir þar hvert handtak. Ég ítreka þakkir mínar, fyrir hönd þjóðarinnar, til allra sem sinna þessum mikilvæga þætti í baráttu okkar við farsóttina.“