Guðrún Aspelund: „Kæmi fram nýtt af­brigði gæti það skapað mjög mik­inn usla hér og í Evr­ópu“

Heil­brigðis­yf­ir­völd hér á landi áttu í morg­un fund með full­trú­um Sótt­varna­stofn­un­ar Evr­ópu og full­trú­um Alþjóðaheil­brigðis­stofn­un­ar­inn­ar – ásamt öðrum lönd­um í Evr­ópu – um út­breiðslu Kóvid.

Var fundurinn haldinn í ljósi opn­un­ar landa­mæra í Kína, en greint var frá því í dag að heil­brigðisráðuneyti Ítal­íu hef­ði komist að þeirri niðurstöðu að all­ir farþegar sem koma til lands­ins frá Kína verði skimaðir fyr­ir kór­ónu­veirunni.

„Enn sem komið er eru ekki kom­in nein til­mæli um aðgerðir, en við erum að fylgj­ast grannt með þessu ástandi,“ seg­ir Guðrún Asp­e­lund sótt­varna­lækn­ir í samtali við mbl.is.

Nokkuð mörg lönd hafa nú gripið til aðgerða á landa­mær­um, sem gilda um þá sem ferðast frá Kína; má nefna Jap­an, Malasíu og Taív­an. Þá hafa Banda­rík­jamenn til­kynnt að þeir muni krefjast nei­kvæðra Kóvid-prófa við komu; hafa hert skil­yrði verið kynnt til sög­unn­ar á Ítal­íu.

„Ítal­ía er eina Evr­ópu­ríkið sem hef­ur tekið ákvörðun um aðgerðir. Það er samt frek­ar verið að mæla með að Evr­ópa sé með sam­hæfðar aðgerðir. Það er ekki gagn­legt að lönd séu að gera mis­mun­andi hluti,“ seg­ir Guðrún og bend­ir á að Ísland sé ekki með beint flug frá Kína; fólk þaðan sem kemur hingað frá öðrum lönd­um, og inn­an Schengen-svæðis­ins, á að geta ferðast frjálst, hafi því verið hleypt inn í eitt aðild­ar­ríkið.

Ekki hafa komið fram nein­ar áþreifanlegar vís­bend­ing­ar um að önn­ur eða ný af­brigði af veirunni séu á kreiki í Kína, að sögn Guðrún­ar, sem slær þó þann varnagla að gögn frá Kína séu afar tak­mörkuð.

„Það er samt ekk­ert sem bend­ir til þess, en það er það helsta sem við höf­um áhyggj­ur af. Ef það kæmi fram nýtt af­brigði þá gæti það skapað mik­inn usla hér og alls staðar í Evr­ópu.“