Alls hafa fjórir aðilar sett sig í samband við Garðabæ vegna hjónanna Beverly Gíslasonar og Einars Gíslasonar sem starfræktu Montessori- leikskóla. Einnig höfðu hjónin starfað sem dagforeldrar í bænum.
Starf hjónanna er nú skoðað vegna barnaheimilis á Hjalteyri sem þau ráku. Þá hefur fjöldi fólks stigið fram og sagt frá því hræðilega ofbeldi sem það varð fyrir af hálfu hjónanna meðan það bjó hjá þeim á Hjalteyri.
Garðabær hefur hvatt fólk til þess að hafa samband vegna málsins sem nú þegar nokkrir hafa gert.
Þá sagði Gunnar Einarsson, bæjarstjóri Garðabæjar í samtali við Morgunblaðið að enginn þeirra sem hafi haft samband hafi komið með ábendingu.
Fólk hafi lýst yfir áhyggjum sínum og óskað eftir því að vera upplýstir um framvindu málsins.
Gunnar hvetur fólk til þess að halda áfram að hafa samband í tengslum við mál hjónanna. Þá sé allt slíkt skráð niður og reynt eftir fremsta megni að hafa góða yfirsýn.