„Það hefur stefnt í þetta. Þeir skilja ekki að þorskurinn þarf að borða og svo er hann að éta undan sér. Furðulegt að heyra um ofmat,“ segir Jón Kristjánsson fiskifræðingur um nýjastu spá Hafrannsóknarstofnunar sem gerir ráð fyrir 13 prósenta niðurskurði á þorski. Þetta er byggt á endurskoðun fiskifræðing asem nú telja að stofnmat og veiðiráðgjöf á liðnum árum hafi verið í rugli. Niðurskurðurinn þýðir efnahagslegt áfall fyrir bæði útgerðarfyrirtæki og þjóðarbúið.
Forstjóri stofnunarinnar ber því við að stofninn hafi verið ofmetinn um árabil. Jón Kristjánsson er ekki sammála því. Hann spyr hvort fiskifræðingar hafi ekki verið að hæla þessum aðferðum sem þeir nota við að mæla stofninn. Þeir virðist gleyma því að „þorskurinn er ekki eilífur“. Þarna sé spurningin um æti og afrán.
„Þetta er sama reiðileysið. Það myndi engum bónda detta í hug að slátra aðeins ákveðnum hluta af fjárstofninum, sama hvort hann á fóður eða ekki,“ segir Jón.