Erilsamur sólarhringur að baki hjá lögreglunni á höfuðborgarsvæðinu.
Alls voru 52 mál bókuð hjá lögreglu síðasta hálfa sólarhringinn og voru fimm færðir í fangageymslu. Einn hinna fimm var maður sem lögregla hafði afskipti af í Breiðholti. Bárust henni nokkrar tilkynningar vegna mannsins, sem var í annarlegu ástandi, „öskrandi og æpandi“, eins og því er lýst í dagbók lögreglu. Fannst maðurinnn eftir nokkra leit og var hann látinn sofa úr sér í fangageymslu.
Annar maður var handtekinn og vistaður í fangageymslu grunaður um innbrot inn á heilsugæslugæslustöð í Breiðholtinu um klukkan tvö í nótt. Þá voru tveir handteknir í miðbænum á sjöunda tímanum í gær eftir að tilkynning barst um innbrot í verslun.
Loks stöðvaði lögregla nokkra ökumenn vegna gruns um akstur undir áhrifum fíkniefna.