• Orðrómur

Halldór segir Fréttablaðið bulla: „Björgólfur Thor eini maðurinn með kjark að stöðva Róbert“

Efnisorð

Deila

- Auglýsing -

Halldór Kristmannsson, fyrrverandi framkvæmdastjóri hjá Alvogen og Alvotech, blæs á fullyrðingar um trúnaðarbrot í starfi eftir að hann fundaði með Björgólfir Thor Björgólfssyni fjárfesti undir lok síðasta árs. Þess í stað hafi fundurinn verið nauðsynlegur að mati Halldórs til að upplýsa um ósæmilega hegðun Róberts Wessman, forstjóra fyrirtækjanna.

Halldór, náinn samstarfsmaður Róberts Wessman til margra ára, átti fund með Björgólfi Thor Björgólfssyni, aðaleiganda Novator, í nóvember í fyrra. Fréttablaðið fullyrðir að tilgangur fundarins hafi verið að afla upplýsinga í því skyni að reyna að koma sér í aðstöðu sem gæti nýst honum til að gera kröfur á hendur félaginu um fjárhagslegt uppgjör sér til handa.

Haldór segir frétt Fréttablaðsins í dag vera fulla af rangfærslum þar sem hann er jafnframt sakaður um trúnaðarbrot í starfi sínu, líkt og fram kemur í stefnu fyrirtækisins á hendur framkvæmdastjóranum fyrrverandi. Halldór hafnar fullyrðingunum í yfirlýsingu sem hann sendi frá sér rétt í þessu enda hafi hann ekki bara rætt við Björgólf Thor heldur marga af  óvildarmönnum Róberts í gegnum tíðina. Þá skorar hann á fyrirtækin að afhenda fjölmiðlum öll gögn og upptökur af yfirheyrslum þess vegna ásakana á hendur Róberti um fólskulega stjórnunarhætti.

- Auglýsing -

Yfirlýsing Halldórs í heild sinni kemur hér að neðan.

 

Halldór er sakaður um trúnaðarbrot í starfi í Fréttablaðinu í dag. Hann er sagður hafa fundað með Björgólfi Thor Björgólfssyni fjárfesti í lok síðasta árs. Fullyrt er að fundur Halldórs hafi verið til að afla upplýsinga, sem gæti nýst honum til að hafa uppi fjárhagskröfur á hendur fyrirtækjunum. Sagt er að „Alvogen telji slik samskipti alvarleg trúnaðarbrot“. Í fréttinni kemur einnig fram að Halldór hafi leitað til lögmannstofunnar Quinn Emanuael til að „knýja fram samningsstöðu.“

- Auglýsing -

Halldór vísar þessu alfarið á bug og segir að rangfærslur í stefnunni, sem hann muni frekar gera grein fyrir Héraðsdómi.  Hann segir umfjöllun Fréttablaðsins ekki rétta, er varði samskipti sín við Björgólf Thor og samstarfsvilja hans í rannsókninni. Upptaka og handrit er til af umræddum fundi, með hinni svokölluðu „rannsóknarnefnd“, sem staðfesti eina af mörgum rangfærslum fyrirtækisins. Halldór segir að fyrirtækin hafi umræddar upptökur en honum hafi verið neitað um afrit af þeim. 

„Ég var spurður um það sérstaklega hvort ég hafi hitt Björgólf Thor. Ég greindi frá því að ég hafi spurt hann um ósæmilega hegðun Róberts, þegar hann var forstjóri Actavis. Hann hafi staðfest við mig ákveðna atburðarrás í ágúst 2008, sem ég taldi mikilvægt að upplýsa um. Á þessum tíma hafi Róbert hringt í Sigurð Óla Ólafsson, aðstoðarforstjóra Actavis og gert tilraun til að segja honum upp störfum undir áhrifum áfengis. Ég staðfesti við nefndina að Björgólfur Thor hafi umsvifalaust rekið Róbert frá Actavis fyrir þessa ósæmilegu hegðun.  Ég taldi þessar upplýsingar mikilvægar fyrir rannsókn málsins og sýni að ósæmileg hegðun Róberts nái yfir að minnsta kosti 12 ára tímabil. Björgólfur Thor virðist því vera eini maðurinn sem hafi sýnt kjark til að stöðva ósæmilega hegðun Róberts.

Þá er því haldið fram í fréttinni að ég hafi neitað að mæta í þriðja sinn fyrir rannsóknarnefnd. Það er alrangt og fyrir liggi staðfesting á þessu á upptöku. Lögmaður White & Case sagði málinu lokið eftir sex klukkustunda yfirheyrslu, nema ég hefði frekari upplýsingar. Ég óskaði þá eftir því að fá aðgang að vinnugögnum mínum, til að geta aðstoðar frekar við rannsóknina og var þeirri beiðni hafnað. Ekki varð því úr frekari fundahöldum og ennþá hef ég ekki verið upplýstur um niðurstöðu rannsóknar, og engin svör fengið frá fyrirtækjunum um ásakanir.“

- Auglýsing -

Hefur rætt við alla óvildarmenn Róberts

Halldór segist hafa sett sig í samband við alla þá óvildarmenn Róberts, sem hann hafi borið þungum sökum og vildi koma höggi á. Eins og áður hefur komið fram, er um að ræða tvo háttsetta embættismenn, alþjóðlegan fjárfesti og íslenskan blaðamann. Halldór segir ásakanir Róberts hafi í raun verið andstyggilega aðför að þeirra æru og mannorði. Halldór telur ekki óeðlilegt að hann ræði við umrædda aðila og beri undir þá ásakanir.

Engar fjárhagslegar kröfur

„Áfram er því haldið fram að ég hafi uppi einhverjar fjárhagslegar kröfur. Ég hef nú í tvígang sent stjórnum Alvogen og Alvotech sáttatillögu. Þar kemur skýrt fram að ég hef engar fjárhagslegar kröfur á hendur fyrirtækjunum. Ég hef líkt og áður áskilið mér rétt til að sækja bætur til Róberts persónulega, en hef ekki haft uppi sérstakar kröfur í þeim efnum. Tilgangur fundarins með Björgólfi Thor var ekki að knýja fram fjárhagslegt uppgjör og það kemur ekki fram í þeim gögnum, sem fyrirtækin hafa lagt fram í héraðsdómi. Ég ítreka áskorun mína um að fyrirtækin einfaldlega opinberi öll gögn úr yfirheyrslum lögmannstofunnar White & Case.“

Engin trúnaðarbrot – engin fjölmiðlaumfjöllun

Halldór segir stefnu fyrirtækisins fulla af fullyrðingum sem ekki standist skoðun. Hann hafi til að mynda upplýst nefndina um að hann hafi við tilteknar kringumstæður rætt við fjölmiðla, en tók sérstaklega fram að engum trúnaðarupplýsingum hafi verið dreift. 

„Staðreyndin er auðvitað sú að enginn fjölmiðill, hvorki hér heima eða erlendis, hafi fjallað um málið á þeim tíma, sem málið var í rannsókn. Það var ekki fyrr en fyrirtækin ákváðu að tilkynna sjálf um „hvítþott“ Róberts, að fjölmiðlar sýndu málinu áhuga.“ 

Sex lögfræðistofur 

Halldór segir að Fréttablaðið geri talsvert úr því að hann hafi leitað til erlendrar lögmannstofu til að aðstoða við málið. Halldór segir ljóst frá upphafi að við ofurefli hafi verið að etja þegar stór alþjóðlegu fyrirtæki og Róbert sjálfur sé annars vegar. Þær lögmannstofur sem hafa verið í sambandi við Halldór eftir áramót eða unnið að tengdum málum eru: BBA Legal, Lex lögmannsstofa,  Landslög og Mandat á Íslandi. Erlendis hafi White & Case og Boies Schiller Flexner gætt hagsmuna félaganna og Róberts. 

„Ég réð einn lögmann á Íslandi til aðstoða mig í málinu. Hann leitaði til erlendrar lögmannstofu með stuðning og þeirra hlutverk hefur verið að sjá um bréfaskriftir vegna málsins. Ef sættir nást ekki í málinu, var óljóst hvar í heiminum slík mál yrðu höfðuð og því var mikilvægt að hafa bakland utan Íslands ef til kæmi.

Lögmaður hjá Lagastoð lögmannstofu hefur unnið að málinu fyrir mína hönd og satt best að segja hefur hann verið hálf einmanna, þegar kemur að því að skylmast við sex lögmannstofur.“

Veistu meira um málið?

Endilega láttu heyra frá þér!
Frjálst er að senda nafnlausa ábendingu en netfang þarf að vera útfyllt.
Fullum trúnaði er heitið.

Deila

Athugasemdir

Athugasemdir eru á ábyrgð þeirra sem þær skrá. Mannlíf áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.
 
- Auglýsing -

Orðrómur

Helgarviðtalið

Lestu meira

Nýtt í dag

Mest lesið í vikunni

- Auglýsing -