Big Bang Theory-leikkonan Kaley Cuoco opnar sig uppá gátt í nýjasta hefti tímaritsins Cosmopolitan. Talar hún meðal annars um hjónaband sitt og tennisstjörnunnar Ryan Sweeting, en þau skildu árið 2015 eftir tæplega tveggja ára hjónaband.
„Ég hélt í alvörunni að ég myndi aldrei gifta mig aftur. Minn fyrrverandi eyðilagði það orð fyrir mér. Ég giftist í fyrsta sinn manni sem breyttist algjörlega. Manneskjan sem ég endaði með var ekki manneskjan sem ég kynntist upphaflega. Og það var ekki mér að kenna – það var honum að kenna,” segir Kaley.
Kaley kynntist unnusta sínum, knapanum Karl Cook, sex mánuðum eftir að hún tilkynnti um skilnaðinn við Ryan.
„Ég vissi hvað ég þyrfti að gefa mikið af mér og hvað mig langaði í til baka. Ég vissi að ég þyrfti að vera þolinmóð og að ég þyrfti að ganga í gegnum ýmislegt, en það færði mig til Karls,” bætir leikkonan við.
Karl bað Kaley í desember á síðasta ári og deildi tilfinningaríku myndbandi af leikkonunni á Instagram þar sem hún sést gráta af gleði.
Í viðtali við Us Weekly í ágúst sagði Kaley að hún og Karl virkuðu vel saman því hún gæti grínast endalaust í honum og hann yrði aldrei reiður. Svo sagði hún að það skipti miklu máli að hann elskaði hunda og hesta.
„Það er alltaf á tékklistanum mínum. Verður að elska hunda er númer eitt og hann tikkaði í það box fljótlega og ég varð yfir mig ástfangin.”