Ljósmyndarinn Drew Doggett frá New York í Bandaríkjunum heillaðist svo af íslenskum hestum að hann ákvað að mynda þá í sínu náttúrulega umhverfi. Úr varð myndaserían In the Realm of Legends, en í henni eru fjölmargar, gullfallegar myndir af íslenskum hestum.
Goðsagnakenndi hesturinn Sleipnir veitti honum innblástur, en merki um það má sjá í myndum hans. Í viðtali við My Modern Met kemur fram að Drew þessi myndi vanalega í svarthvítu, en hafi ákveðið að hafa myndaseríuna af hestunum í lit.
„Ljósið kallaði fram dásamlegan litblæ sem bætti yndislegri áferð á seríuna í heild sinni. Það, ásamt andstæðunum á milli landslagsins og hestanna, sannfærði mig um að þessar myndir þurftu lit.“
Hér fyrir neðan má sjá nokkrar af myndunum úr seríunni, en einnig er hægt að heimsækja vefsíðu Drews eða Instagram-síðu hans til að sjá fleiri myndir.
Myndir / Drew Doggett