„Sporna þarf við því að hjúkrunarfræðingar sæki í önnur störf og fá þá sem hafa horfið til annarra starfa aftur til baka,” segir í greinargerð frá Félagi íslenskra hjúkrunarfræðinga sem þau sendu frá sér í gær. Þar er vakin athygli á afleiðingum þess sem mönnunarvandinn gæti valdið bæði sjúklingum og heilbrigðiskerfinu. Þá er skorað á stjórnvöld til þess að grípa inn í.
Bæta þurfi bæði starfsumhverfi og kjör hjúkrunarfræðinga til að sporna við þróuninni en lausnir og tillögur að úrbótum megi finna í skýrslum heilbrigðisráðuneytisins sem kom út fyrir tveimur árum síðan, árið 2020. Á fundinum var ákveðið að skora á Willum Þór Þórsson, heilbrigðisráðherra, að fá leiðréttingu á kynbundnum launamun í stéttinni. Telja hjúkrunarfræðingar að mönnun ógni þegar öryggi sjúklinga og því þurfi að bregðast við fljótt og örugglega. Fréttablaðið fjallaði fyrst um málið.