Austurfréttir sögðu frá því í gær að fundist hafi taflmaður úr hnefatafli á Seyðisfirði en þar stendur yfir fornleifafræðiuppgröftur. Stjórnandi uppgraftarins telur þetta styrkja stoðir undir þá tilgátu að kuml sé þarna að finna.
Í síðustu viku fannst á svæðinu kuml en taflmaðurinn fannst í nokkurs konar gryfju um 1-2 metra innan við kumlið. Var gryfjan afmörkuð með steinum. Þar hafði áður fundist rafperla.
„Þessi gryfja er sérstök. Við höfum fundið fullt af beinum í henni, meðal annars hvalbein. Það er eins og sett hafi verið rusl í hana en mögulega var hún grafin í öðrum tilgangi,“ segir Ragnheiður Traustadóttir í samtali við Austurfrétt, en hún stýrir uppgreftrinum.
Hnefataflmaðurinn virðist vera úr steini eða leir en hann er 2×2 sentimetra á stærð. Hér má sjá þrívíddarlíkan af taflmanninum.
Frá víkingaöld og fram á miðöldum var Hnefatafl spilað en reglur borðspilsins eru ekki að fullu þekktar í dag. Um miðja nítjándu öld fannst hnefatafl í Baldursheimi, Mývatnssveit, sem enn í dag er talið hið þekktasta sem fundist hefur hér á landi. Hér má sjá það.
Ragnheiður segir í viðtali við Austurfrétt að þessi fundur styrki að þarna hafi verið kuml en að svæðið virðist hafa verið nýtt í annað síðar. „Það er grunsamlegt að finna þessa gripi í beinasafninu.“
Nú leggur Ragnheiður mesta áherslu á gryfjuna þar sem hnefataflmaðurinn fannst en reynt verður að klára að grafa hana upp fyrir lok vikunnar. „Við erum ekki komin til botns í henni, við höfum lítið getað grafið í dag vegna veðurs. Við vonumst til að geta sagt hvers konar gryfja þetta var með nánari rannsóknum fyrir lok vikunnar,“ segir Ragnheiður í samtali við Austurfrétt.
Sjá meira hér: Kuml fannst á Seyðisfirði: „Við sjáum að beinin eru ekki öll á sama stað“