Lögreglan hefur handtekið mann sem hótaði því að sprengja Útvarpshúsið. Maðurinn gerði það um klukkan sjö í gær og lofaði að sprengjan myndi springa síðar um kvöldið. Hann tjáði starfsmanni RÚV þetta í símtali. Þetta kemur fram í dagbók lögreglu.
Vikan með Gísla Marteini er tekin upp í beinni útsendingu um það leyti sem maðurinn hótaði að láta til skara skríða. Þátturinn í gær var sá síðasti í vetur og voru gestir Gísla því ekki af verri endanum.
Þar má helst nefna Katrínu Jakobsdóttur forsætisráðherra en einnig Ölmu Möller landlækni. Ekki er ljóst hvort sprengjuhótunin beindist gegn Gísla eða gestum hans en þó er ljóst að lítil önnur starfsemi á sér stað í Efstaleiti á þessum tíma.
Maðurinn var handtekinn og lögregla leitaði að mögulegri sprengju í húsinu og við það. Ekkert fannst en þó var fylgst vel með húsinu í gær.